煲呔噚日又出巡，今次去番佢舊時細細個成日喺度走嚟走去嘅中西區，睇咗三個景點，第一個係有一百年歷史，位於堅道嘅香港醫學博物館，唔講唔知，呢座紅磚愛德華式嘅建築物，前身係舊病理檢驗所。
之後煲呔就去咗位於高街嘅西營盤社區綜合大樓參觀，呢間大樓前身原來係舊精神病院，不過，𠵱家就變咗做幼兒所、展能中心同長者中心，煲呔見到小朋友最開心，因為引起佢好多兒時嘅回憶喎，佢仲留喺度睇歌舞表演，間幼兒中心就送咗一盆寫住「灌溉幼苗，我們需要您的支持」嘅盆栽畀特首，期望煲呔喺欣賞錦鯉同飛鳥之餘，都同樣愛護植物，培養幼苗。嘩！真係一啲都唔似BB班嘅手筆，唔知煲呔有乜反應。
最後佢就去咗西港城食甜品，撞到個內地嚟嘅學者，嗰位朋友笑話，喺大陸咁耐都冇機會見過自己市長，估唔到喺香港一陣就碰見特首。梗係啦，煲呔𠵱家博出鏡，希望保持民望穩步上揚至連任嗰陣，咁就發達啦。
另外，曾經叫上任特首老董做「三零部隊」嘅陳啟宗噚日宣布，由佢做執委會主席嘅明天更好基金換行政總裁，袁金浩（George）八月底做滿九年正式退休，接任嘅係港大前傳訊總監、靚女鄧淑德（Karen）。
Karen六月就上任，佢阿姐都來頭不小，最緊要係做過當年基本法諮詢委員會會務主任，跟過邵善波同馬力，梗有運行。
爆料熱線：29290000、27860099
報料傳真：26239278
報料電郵：[email protected]