外號「飛俠哥頓」嘅合和主席胡應湘，雖然已經將盤生意交晒畀乖仔胡文新，自己全職做「胡文新助理」，不過佢仍有心願未了，所以唔會退休。乜嘢心願？當然係佢講咗五年嘅港珠澳大橋。呢條橋，明明係對港珠澳三地都有利，但就諸多阻滯，遲遲都拍唔到板招唔到標。噚日有班傳媒高層北上拜會廣東省領導，個發改委主任講到呢條橋，講到青筋暴現，話照現時進度2010都起唔好。
萬事俱備差隻老虎未死
咁究竟有乜問題咁難解決？飛俠哥頓欲言又止；佢話「單Y雙Y」、「有冇鐵路」、「邊處落腳」等等23個專項問題已經解決晒，目前只剩兩關要過；第一係「邊檢」，第二係「融資」。
Sir哥頓贊成在澳門淺水區建一個人工島，集合中港澳三地海關，一地三檢，咁就最「以人為本」方便旅客。當然啦，唔通在大嶼山過一次香港海關，出到伶仃洋過一次祖國海關，到馬交又過多一次澳門關咁戇居咩。至於融資，早前有人吹水話要600億，飛俠就好豪氣咁話，你畀300億佢馬上簽字同你起。佢仲話有大把銀行支持佢，有間叫佢唔使搵其他人融資，佢哋一間都食起晒。
依八方睇，呢兩個都係技術問題，好易解決啫，咁四四六六拆掂佢，年尾招標，明年動工，三年後就可以揸車過大海。到時燊哥實要送晒啲水翼船畀哥頓，因為一架車坐五個人，來回收300蚊，平均每人路費60大元，重有人搭船咩。但冇所謂噃，賭場贏番夠本，都費事賺船飛咁濕碎。
真正阻力喺邊度呢？飛俠點都唔肯講，只肯講古仔。佢話以前有兩師徒做大戲，師傅做武松，徒弟扮老虎，有次徒弟問師傅攞錢，師傅唔畀。點知上咗戲台，隻老虎打極都唔肯死，卒之師傅應承畀錢，隻老虎至肯瞓低。哥頓𠵱家就係萬事俱備，只係要等隻老虎死。
八方聽完呢個古仔都覺得幾好笑。咁又係，你雖然係飛俠，但人哋都一樣識飛，仲飛得更高更遠直達天庭。你起咗條橋影響貨流，等於做人世界，點會唔出動各方力量阻攔你呢，酒店都唔畀你起，何況橋！真係大想頭，就算搞得掂邊檢同融資，都可以叫啲海豚出動，話你唔環保！
係邊個咁犀利，連海豚都指得郁？都唔使畫公仔畫出腸啦。
爆料熱線：29290000、27860099
報料傳真：26239278
報料電郵：[email protected]