呢邊廂CAPCOM猛咁出《街霸》合輯，嗰邊廂SNK又玩埋一份，繼宣布推出《拳皇：大蛇篇》合輯後，輪到旗下另一經典系列《龍虎之拳》。猶記得當年《街霸》玩晒成個格鬥界，挑戰者SNK先以《龍虎之拳》試市場反應，點知出奇地好，後尾先引伸出人多取勝嘅《拳皇》系列。
合輯版《龍虎之拳：天地人》對應PS2，包含1、2集及外傳，可算玩齊成個系列，除咗完全呈現街機版之神髓外，仲設有MMBB連線對戰，以及首度出現嘅角色編輯功能，玩家大可將坂崎獠、Mr.Big改頭換面，頭髮同衣服換晒自己喜愛嘅顏色，再Online同人隻抽，都咪話唔盞鬼！
記者：徐影龍
外傳首登陸家用機
最經典當然屬92年推出嘅第一集，人物因應距離放大縮細、儲氣出招、打散對手氣功波等，當年最震撼係首次出現超必殺技，亂舞系攻擊扣對手九成HP，真係一發逆轉！呢招龍虎亂舞仲要抵死到屬隱藏技，玩咗成個月先有機迷「符碌」出到，當時喺機舖真係唔少人圍觀㗎。
值得一提係《龍虎之拳外傳》並未推出過家用版（連NeoGeo都冇），今次PS2版一次過重溫三集，的確買嚟儲都值得。