中石化（386）要私有化餘下公司，最新消息係：時機經已成熟。上海石化（338）同儀征化纖（1033）嘅私有化行動都已排上日程表，但消息有兩個版本，一個係先做儀征，一個係兩間一齊，「嗱嗱聲」搞掂。時間方面，5月會有動作，但快起上嚟，可能呢幾日都會有聲氣。
私有化條件有兩個版本，一個係現金，另一個係涉及換股，但無論係用現金抑或換股，私有化價格都會有溢價，消息話儀征約在2.80元至3元，上石化約5.60元至6元。
呢兩三日股市大幅調整，儀征更回落到2元水平，博私有化，已「好好肉」，若消息屬實，有機會賺4成。
儀征噚日跌到2元水平才反彈，收2.10元，同3月底的2.375元比較，已回落逾1成，值博率更吸引。
理論上，股市升到家吓呢個水平，可謂風高浪急，選股投資或炒賣，難度亦愈來愈高，好似儀征同上石化呢類九成九會被私有化嘅公司，實在揸得過，起碼下跌嘅風險唔大。儀征現時的每股資產淨值（NAV）約2元，呢個位應有支持。
石化股私有化進程已行咗大半，私有化作價比NAV都會有溢價，以往例子係，由62%至164%不等，超過100%的有6家，而平均係118%。儀征最近賣公司，小賺大蝕，計埋條數，NAV約1.90元，即使以最低溢價62%計，私有化作價都超過3元。
內地一聲五一後啓動調控，港股即大跌，中資股更跌到四腳朝天。股市急升後調整好正常，由於宏調會以行政控制貸款增長為主，市場預期內地地產業會首當其衝，因此內地地產股的跌勢最急。
中油好戲在後頭
中資股早輪熱火朝天，冷卻一下，係好事。上一次宏調，係03年，影響都幾大，但家吓經濟冇當時咁熱，所以調控嘅力度亦應該唔會太大，中資股調整後會係另一個低吸機會。
中油（香港）（135）繼續成為市場焦點，噚日最低落到4.55元，但中段已由低位強力反彈，結果掃到上5元最高價收市，仲上升0.1元，大行買盤鍥而不捨，好戲仍在後頭。
郭兆誠