NDS推出至今，畀唔少人有種玩具嘅感覺，即使出埋Lite都唔能夠輕易動搖呢種諗法。舊年呢段時間佢出咗全民瘋狂嘅《任天狗》，吸引唔少女性顧客或者用佢嚟冧女嘅男仔出機，但都幫唔到佢洗底，直到最近佢接二連三推出高質素食腦智力遊戲，開始扭轉佢響香港二奶機嘅命運。無他嘅，如果𠵱家你仲唔趁機《BrainAge》一下，就算你個腦唔生銹你都真係Out到透！
文：陳福榮
假如閣下係一名標準機迷，或者係好留意日本潮流玩物嘅潮人，就必定聽過《腦鍛練》同川島隆太呢兩個名詞。咪睇佢賣得平、畫面簡簡單單咁，佢出咗成年𠵱家喺日本平均每星期都仲賣緊五、六萬隻，累積銷量差唔多到兩百萬，誇張到飛起！亦因為佢全面掀起日本玩食腦Game嘅熱潮，任天堂得勢不饒人，響舊年年尾出多集《再來腦鍛練》，仲搵埋日劇女王菜菜子做代言人狂谷廣告，至今銷量亦差唔多到兩百萬，以齋玩計數MiniGame嘅遊戲系列嚟講，真係可一不可再。𠵱家佢嘅美版《BrainAge》剛剛推出，唔多識日文嘅你當然咪走雞啦！
美版追加數獨
基本上美、日版除封面唔同，內容差唔多一樣，無論「BrainAgeCheck」抑或「Training」都係嗰批MiniGame。不過因為「讀書」、「聲音計算」同「認顏色」絕對蝦到日文唔掂嘅朋友，好似「讀書」要全篇文逐個字讀出嚟，唔識日語又點讀呢？玩美版講英文點都易啲啦！
此作非把日版搬字過紙咁冇誠意，內容有九成幾似足原版，不過佢特地增設咗𠵱家仲係好Hit嘅「數獨」在內，唔同難度嘅題目總數更超過一百關，逐關玩都有排玩。比起獨立推出嘅《數獨》NDS版，《BrainAge》收錄咗咁多計數同考記性遊戲，加上仲要賣得平啲，真係諗唔到理由捨佢而選前者啦。買一得二你仲想點？
收錄遊戲多籮籮
遊戲設兩大模式，分別幫玩者評測腦袋年齡嘅「BrainAgeCheck」以及進行訓練嘅「Training」，好似「20問」同「100問」呢類簡單鬥快計數就兩邊都有得玩，而「背生字」呢啲就只會喺測腦嗰陣隨機出現。每種食腦遊戲玩法不單止唔同，講求嘅腦力亦有所分別，有啲仲要用埋個咪，對住部NDS準確讀出英文單字，發音差啲都唔成事。好彩佢可以自由選擇玩唔玩要用咪嗰啲Game，咁嘅話搭車玩都冇咁尷尬啦。
港人實試
雖然小記對《BrainAge》讚不絕口，但到底街坊朋友又點睇呢？不如捉兩個睇落平時都會打吓機嘅人，睇吓佢哋覺得呢隻新作抵唔抵玩？
小葵（16歲）學生
「之前我玩過日文嗰隻《腦鍛練》呀！但有好多嘢都睇唔明，呢隻英文版好好多，啱晒轉堂或者Break嗰陣偷雞玩。」
阿明（29歲）Sales
「好似幾得意喎，又計數又數吓嘢咁，仲要對住部機講嘢，冇其他PuzzleGame咁單調囉。最頂癮係佢要打棟嚟玩！」
PROFILE
遊戲類型：ETC
對應機種：NDS
遊玩人數：1人（可16人連線）
售價：$150
售賣點：DreamStore（25753285）
地址：灣仔東方188商場G04、256號舖
