有啲炒家成日話，中電（002）正一孤兒寡母股，揸住唔會發達，但每三個月咁收息，亦唔會蝕得去邊。不過，佢哋交到功課又派高息，對小股東亦唔慳家！
話說中電噚日一改多年傳統，唔喺同屬一個老闆嘅半島酒店開股東會，改喺理大嘅大禮堂。官方解釋係半島唔夠大，但有人估可能唔想綠色和平組織搞半島個場。但華華覺得理工個場都幾好，唔使坐到迫迫挾。
雖然今次股東會移師理工，但中電仍然搵半島酒店供應茶水，之後每個股東仲可以攞走一盒半島三文治加餅亁同朱古力，再加一把中電雨遮！小股東真係又收息，又收禮物。不過，今次華華有啲不滿，就係唔俾記者入股東會。希望下次改善吓！你睇，一早發定帖請記者去股東會，至有大企業風範。