今日，梗係要繼續講選委會選舉啦，份份報紙都仲講緊乜嘢界別有啲乜嘢新動向，我阿利日日睇咁多報紙，抄埋抄埋，都夠寫幾篇稿。
報紙話律師會打算搵十零人聯票出戰選舉，實行跟星光熠熠嘅大狀抗衡。會計師公會又會唔會有人聯票出擊？睇怕抆水。莫講話未必個個有興趣選，就算有興趣選嗰啲，互相都未必諗緊同一樣嘢。睇嚟應該會係游擊戰居多。
話雖如此，唔代表無團體聯群結黨出現，況且近年會計界有唔少組織蒲頭，有幾個組合夾份出選，分擔吓啲選舉經費，一啲都唔奇呀。
每逢選舉，梗係要啲選舉議題。咁會計界又有啲乜嘢選舉議題？唔好話我阿利唔醒幾招過你哋。
根據我聽聽埋埋，不外乎呢幾樣。首先，係財務滙報局。之不過，雖然呢個局好似好巴閉，但都只不過管啲上市公司嘅年報，對於九成以上嘅會計師行，冇關係。
其次係有限責任制。但同樣，嗰啲成日驚俾大陸有錢佬跣嘅大行，先至最關心，對於大部份唔係會計師樓老闆嘅選民，又冇乜關係。
選唔選曾蔭權？
北上搵食？CEPA？呢啲嘢又係跟絕大部份嘅選民無關，皆因佢哋一早已經喺上面搵緊食緊住緊。𠵱家先講，遲啲啩？
講來講去，要搵啲會計界關心嘅議題，幾乎冇，剩低嘅只有選唔選曾蔭權，又或者要唔要推一個人去死，同佢選過。
所以話，今次選舉單。