呢個周末，孫柏文睇到兩篇新聞報道，原先覺得冇乜關係，不過諗諗吓我隻金手指就充滿血液，想篤一篤，希望可以為大家啓發吓新思維。第一篇新聞，講喺桑赫斯特皇家軍事學院（RoyalMilitaryAcademySandhurst）做緊軍人青檸（training）嘅前宗主國王子哈里，話畢業之後要同班同學去伊拉克前線「工作」。第二篇新聞，就係講曾蔭權特首，深切體會到香港原居民，每日面對冇瓦遮頭、無家可歸、露宿街頭、冇晒尊嚴嘅非人生活，所以就「福為（原居）民開」咁，放寬起丁屋嘅限制。
對孫柏文嚟講，哈里王子係代表一個完全過時嘅世襲式帝制嘅人，因為對於我哋呢代人，同我哋講話有啲人因血緣關係，一出世國家同政府就會畀特權佢，我哋好難接受。所以，我係極少數覺得97年香港係被「解放」，而唔係「回歸」咁簡單嘅人。由一個世襲式帝制嘅殖民統治，去到一個理論上人人出世平等，人人都有機會做國家領導人嘅共和國世界，唔係開明好多咩？
小人上戰場 君子歎冷氣
咁大家作為我醒目嘅fan屎，一定會問：「咁好，又唔見前宗主國嘅人，廢除帝制走共和國路線？」孫柏文話問得好！因為，前宗主國係「真小人」，佢哋擺到明有人因血緣關係，一出世就有特權，不過為了服眾，令到帝制可以得到人民支持繼續存在，愈係有特權嘅人，就愈要履行做國民嘅責任。例如為咗保家衞國而戰嘅時候，連王子都要喺伊拉克站在最前線，食子彈。平民百姓見到仲唔心服口服？
咁我就再諗，如果前宗主國係「真小人」，咁花旗國咪係「偽君子」。口口聲聲話共和國人民，人人平等，不過睇番當年，花旗國喺越南同共產主義開拖，現任花旗國牛仔總統，就好英勇咁喺德州歎冷氣抗敵，成功捍衞西方「自由世界」。雖然牛仔總統因冇份去越南，所以執番條命，不過後遺症係有好多人唔服佢，令到花旗共和國同世襲式帝制冇分別。
不過最起碼，牛仔總統冇因為有權力可以唔去越南，而引以為榮，話國家欠佢一個留喺德州歎冷氣嘅權利。
大家睇到呢度可能會問：「咁關原居民乜事？」大家諗吓，喺06年嘅中華人民共和國之內，作為真正愛國愛港人士，點樣可以容忍一班人因血緣有世襲式嘅權利，一出世就有特權攞值五百萬元嘅丁屋？每一間97年之後建成嘅丁屋，都係一個侮辱共和國主義嘅實物。今時今日大大聲話丁屋係權利嘅人，知唔知佢哋係侮辱緊共和國精神。佢哋對得住孫中山先生、毛主席、所有為中華人民共和國流過血嘅人咩？盼望原居民反省、反省。
孫柏文