王菲預產期係下個月，佢老公李亞鵬為咗到時可以陪老婆待產，喺王菲生之前多啲陪老婆，於是日接夜，夜接日咁不停趕拍電視劇《為愛結婚》，結果前兩日終於頂唔住捱到胃抽筋。前幾日李亞鵬連踩兩組，喺北京一間精神病院開工，點知拍拍吓突然胃抽筋，當時老闆張穎諗住送佢去醫院，但李亞鵬淨係吞咗兩粒藥丸頂住就算，見佢堅持同導演傾劇本個樣，張穎同劇組嘅人都好擔心。
飛車返家瞓覺
雖然目前李亞鵬要開兩組戲，返屋企休息嘅話，一來一回會好浪費時間，但李亞鵬一於少理，寧願辛苦啲自己揸車趕返屋企陪王菲，都唔願意喺劇組留宿。
聽張穎講，佢哋會爭取喺下個月二十號完成所有拍攝，馮仁昭即刻聯想到，王菲嘅預產期莫非就係呢個日子？其實，呢部劇本來唔係喺北京拍外景，𠵱家改咗地點，莫非又係為咗遷就李亞鵬陪王菲？而女主角李小冉原本打算利用拍緊劇嘅空檔錄唱片，但都因為要遷就李亞鵬而全部泡湯。