唔摷行情表唔知，33隻恒指成份股，有17隻下月除息，着咗1半，派息總額接近370億元，到時總共拖低恒指114點。4月期指明日結算，高水13點，冇乜指導作用。5月期指表面低水120點，但計入除息拖低恒指114點，5月期指實在只係輕微低水6點。唔使大驚小怪話5月大低水，今回唔多妥。
兩日下來，恒指調整335點。預咗再跌些少，或過埋4月尾期指結算，喺低位開始部署買C輪，子彈分幾次用，贏錢過端午節。
滙控C輪2228：滙控（005）前周跌到最低130.50元即止跌回升，上返去134元，昨日131.90元。喺軟軟哋市況中，再觸及130.50元唔係冇可能，當然未必要再見130.50元先至會反彈。吼滙控回多1蚊幾毫，低買C輪。
唔想太搏殺，唔想一邊炒輪一邊搽白花油，正路之選係隻2228，7月初夠鐘，輪價55仙，溢價0.5%，槓桿率24倍（有效18.5倍），引伸波幅11.6%。
和黃C輪9192：和黃（013）跌0.70元，兩日夾埋升1.65元。有大賣家當賺大錢咁好消息，要跌番上周水平，機會不大。吼住再跌幾毫，撈C輪博反彈，9192啱睇。隻輪6月頭到期，輪價22.5仙，溢價1.3%，槓桿率34.2倍（有效18.3倍），引伸波幅20%。
章盛