澳門嘅旅遊業愈嚟愈旺，打開門口做遊客生意嘅一定大把世界，熱門零售區嘅舖租升完可以再升，高到你唔信都得。好似喺板樟堂由莎莎租開嘅一個三層高舖位，剛由Esprit租咗，月租63.8萬，呎租456蚊，直迫香港一線旺區地舖水平。個舖位面積共1400方呎，新租客將三層改裝成兩層，等個樓底高啲。
美聯澳門行政總裁張一輝話板樟堂區嘅地舖，呎租普遍要200蚊至有交易，今年第一季輕微回落至178蚊呎；除非係大品牌，唔係都頂唔順。
咁市場都唔係無平租選擇嘅，因為新式商場，呎租只係十零二十蚊一呎，所以成為個體戶創業嘅首選。
美聯澳門區域營業董事方志偉就話，呢啲新式商場，成為澳門青年人創業嘅落腳點，一個舖位月租都係萬零蚊。
好似澳門廣場咁，仲吸引埋香港人嚟開檔㖭。曾經喺香港賣服裝嘅黃先生，以月租1.2萬租咗一個504呎舖位，連埋管理費都係1.4萬，專門售賣韓國時裝，客戶以白領同高消費旅客為主。
另外，有個香港專欄作家，4年前定居澳門，喺荷蘭園一條橫街租咗兩個舖，夾埋每月都係6000蚊租，售賣壽山石、蜜蠟同水晶；同類舖喺香港要月租3萬蚊至有交易。
美聯做咗個調查，訪問200個客，31%話呎租15至20蚊就最合理，23%表示呎租20蚊以上都冇問題。睇嚟啲新式商場都唔憂冇租客。
電郵地址：[email protected]