平日下午3、4點呢啲時間，亞視兒童台收視率唔慌好好，不過亞視向來慣出奇招，噚日突然搵咗前財政司司長梁錦松同電盈前副主席張永霖現身螢幕，兩個猛人上電視，雖然節目係重播，但至少多咗八方做觀眾。
阿松辭職後未有正式「米路」，「青樓名妓」張永霖更處於退休狀態，「量地雙雄」上電視同班小學生真情對話，正式係只談風月，有細路問阿松點樣學好英文，佢話自己細個時英文好水皮，直至有機會喺老董伯爺董浩雲創辦嘅海上學府讀書三個月，迫住要講英文同世界各地同學溝通，英文先至好啲，張永霖則講吓管理心得工作經驗，難得班細路好似聽得津津有味，應該無嘥佢哋啲口水。
「量地雙雄」以前連同財經局長馬時亨被譽為中環風塵三俠，馬仔出年「拜拜」機會極高，屆時三俠大可重出江湖，搖身一變成為「量地三雄」。
爆料熱線：29290000、27860099
報料傳真：26239278
報料電郵：[email protected]