昨日大市雖然只跌百零點，但好多近期當炒的二三線股跌到散晒，最難明就係麗新發展（488）同埋豐德麗（571），照計出售部份澳門地產項目予美國基金，兩間公司獲利良多，但股價走勢居然弱過藥煲，實在令人費解。
尤其係直接得益者豐德麗，股價竟然連跌兩日，昨日再跌13.33％，收5.20元，成交高達1.02億元。
經紀黃話，豐德麗喺3月時曾經以每股5.80元配股集資，唔排除有貨源落在對沖基金手上，隻股停牌前曾炒上7.30元，家陣好消息出埋，加上市況轉弱，所以被質低。
經紀黃又話，如果要炒澳門概念股，信德（242）相信會穩陣啲，信德剛公布業績，盈利下跌24％至3.64億元，主要係澳門賣樓嘅收益，於06年始反映，所以05年業績倒退，一早在市場預期之內。另外，信德佔有權益的澳門博彩，上市一事進行得如火如荼，近期已有證券行調高信德的目標價。
慕容小初