港台呢輪真係腹背受敵，唔怪得廣播處處長朱培慶上個星期六接受訪問時形容自己係過客，好似「流水的官」，隨時可以起身唔撈。
搞到朱兄要成日表態，皆因煲呔誓要置港台於死地，不准佢哋再造老闆（即特區政府）的反。君不見，聽日先至提交畀立法會嘅審計處報告預早張揚話會郁港台，審計署史無前例派咗七個人坐咗入港台七個月，由底剿到面，唔係點會有成兩個chapters批RTHK。之後當然由「吉叔」黃應士接力，佢個報告先攞你命。
朱培慶咁好火，因為明知大難臨頭，但係又唔可以抽身而去，佢老哥○八年先夠六十，而佢嘅副手吳錫輝今年七月就同港台說再見。
到目前為止，聽講政府都未肯就吳錫輝接班人問題開board，港台梗係想兩個助理處長戴健文或者張文新頂上，不過，煲呔未必咁諗，既然審計報告指港台「行政紊亂」，咁就係最好時機空降個至叻行政嘅AO落去，真係唔好俾八方估中。
傳真︰2623-9278
電郵︰[email protected]