香港話晒係國際社會，不過唔少非我族類嘅外籍人士甚至係內地同胞，喺初嚟甫到時，唔多唔少都受過一啲歧視。為咗消除種族歧視，平等機會委員會同香港電台第二台噚日宣布舉辦「平等機會多元共融行動」，由下個月十二日開始，每逢星期五下午一至三點，都會有DJ李志剛主持嘅新節目「MadeinHongKong李志剛」，邀請唔同族裔嘅人士討論吓平等機會嘅議題。
大會邀請咗藝人喬寶寶、河國榮同郭芯其分享吓有冇試過俾人歧視。喺香港出世嘅喬寶寶話，試過俾人以「刀刀叉叉」（阿差）嚟形容自己，感覺都唔好受。
河國榮就成日俾人叫做鬼佬，不過佢話香港人冇加個「死」字喺前面，都算係咁。至於廣州嚟嘅郭芯其就話，初初仲會有一啲市民見佢生得咁高，唔似香港女仔就投以奇怪目光。出席同一場合嘅平機會主席鄧爾邦就話，希望政府盡快就種族歧視條例立法。
傳真︰2623-9278
電郵︰[email protected]