近期又鬧得熱烘烘嘅「雙氧水教會」錫安教會，神秘莫測，教主梁日華更行蹤詭秘。不過，噚日佢哋突然派兩位信眾殺入將軍澳，送份關於佢哋網站《錫安日報》同教義嘅資料畀八方。
當中介紹梁日華履歷最令八方感興趣。現年四十四歲嘅梁教主，花名「麻麻」，先後畢業於香港嘅聖約翰小學、陳樹渠中學同埋TrinityWesternCollege；佢已婚，仲有一個五歲半嘅仔，自稱身體特徵係頭髮漸漸增多。
梁教主嗜好認真唔少，佢話鍾意閱讀，每年睇成一百本書，有間私人圖書館；平時工作清閒，日花八粒鐘睇書，尤其鍾意睇投資同成功人士嘅書籍，而電腦策略game同無線電遙控玩具更係佢心頭好，十足十「逍遙派」教主。八方好奇怪佢點解咁悠閒，事關班信眾之前自爆，教會財政每月鋪鋪清，有時更入不敷支，梁教主既然無咩做，係咪應該減人工？醫學界人士早就講咗飲雙氧水對人體有害，所以八方最後奉勸一句，千祈唔好飲雙氧水！
傳真︰2623-9278
電郵︰[email protected]