選委會仲有成大半年先選，但各路人馬已秣馬厲兵，尤其係民主派志在必得嘅法律界，大家都積極部署同佢哋抗衡。律師會噚日同傳媒飯局，會長羅志力話初步已經有張十人出選名單，副會長何君堯同理事馬華潤都話會長叫到，一定去馬，佢哋主要sell「中立」，因為唔少出嚟選嘅法律界都有政黨背景咁話。羅會長仲同八方講，如果今次成功，下屆立法會法律界功能組別選舉會再接再厲，支持候選人同大律師公會鍊過。
有傳前律政司司長梁愛詩都可能出嚟選，講開詩姑同𠵱家仁龍哥嘅比較，有法律界中人形容詩姑係紅毛丹，外表睇落有啲拮手，但內裏軟腍腍，好人一個；仁龍哥則係綿裏針，表面好鬼nice，但去到一啲問題會好講原則，其實最啱做法官。
法律界呢排最hit嘅話題係律師可以做婚姻監禮人，羅志力呢個禮拜六就幫朋友監禮，原本有機會成為全港首單，點知俾人搶閘，但佢同何副會長都話，律師做婚姻監禮人其實唔搵得幾多，因為每次連埋準備工夫，至少要搞三個鐘，收費可能得一千幾百，上庭同做樓宇買賣好搵好多，不過呢期最好搵嘅係做內地企業上市、融資，何副會長計劃下個月帶隊上大陸，向內地企業介紹本地律師喺呢方面嘅服務。
不過，律師會迫在眉睫嘅事務係呢個禮拜四開會表決用邊個買保險方案，即係沿用集體基金買，定由律師行個別向承保人買，因為呢件事喺會內都引起幾大爭議。
傳真︰2623-9278
電郵︰[email protected]