商場競爭非常激烈，大業主真係愈嚟愈難做，要不斷搞活動先可以吸引到消費者。咁究竟有幾難做？睇吓信和嘅旗艦商場大角嘴奧海城就知，一年嘅活動有520個，平均兩日就有3個活動，淨係諗有乜嘢好搞，睇怕已經頭都大埋。剛過去嘅周日，商場一共舉辦咗7個活動，請埋明星嚟撐場，務求令到商場人山人海。
嚟緊嘅五一黃金周，奧海城自然要迎合內地旅客，搞搞新意思啦，聽信和物業管理總經理蘇蔡潔蓮話，會安排幾十團內地旅客到場購物消費，主要嚟自廣東省市，每團至少40人，預計黃金周嘅商場人流有160萬，內地客佔15至20%；營業額就升至2700萬。
為鼓勵內地客使多啲錢，信和就搞「五‧一終極購物王」比賽，喺5月1至7號，每日消費最多嘅內地客，可以贏到4000蚊現金購物券，之後再喺7個中選出冠軍，有一萬蚊旅遊現金券，同價值兩萬五千蚊嘅港麗酒店主席套房免費住宿。睇嚟想勝出先要大出血至得。
蘇蔡潔蓮話內地客最鍾意買嘅係運動用品、金飾同參茸。以每個家庭計，消費金額係2500至3000蚊。
另外，奧海城今年首季嘅營業額係4.5億，比舊年同期多20%；預計4同5月每月都會有雙位數字升幅。
電郵地址：[email protected]
