港股調整，但上升股（唔計認股證）仍有200多隻，雅域集團（1229）收1.33元，升3仙，消息話短線可留意。
個多月來，雅域最高曾見1.38元，大部份時間則在1.20元水平反覆，噚日逆市而升，已創出今年的新高收市，若升破1.38元高位阻力，照度上去，中線上升目標係2.35。
不過，雅域係轉型股，亦係概念股，風險與回報成正比，若破關而上，可以上移止賺位一直持有，賺到盡；但一唔對路，就要走頭，所以一定要落止蝕位，建議係徘徊區嘅底部1.15元。
雅域原本業務好多元化，包括製造及銷售時鐘、照明產品同金屬貿易、製藥同提供電鍍服務。今年開始，公司逐步轉型，2月底出售所持藥業公司49%權益，3月底就斥資5040萬元，收購MatrixSoftwareInc.，進軍網上電腦遊戲業務，以發行4200萬股新股，作價1.20元支付。
仍有項目在洽商中
雅域將在中國及港澳三地推出名為「熱血男兒」的網上電腦遊戲，Matrix已與中電華通通信訂立協議，為「熱血男兒」提供經營網絡平台同管理。中電華通係獲授權在中國經營網絡平台之持牌經營人，其業務包括無線通訊、資訊服務同經營全國性網吧連鎖店。
除落實網上電腦遊戲業務外，消息指雅域正有兩三項具「震撼性」的項目在洽商中，若成事，相信股有價會有強烈反應，而大行同基金亦會埋位。
講番個市，噚日受日股大跌拖累，借勢調整一下，係好事，恒指跌逾200點，H指跌142點，回一回氣，又可以擇「肥」而噬。呢個「肥」字，包括質優股、落後股同概念股，下一個升浪，呢類股份仍會成為主力追捧的對象。
中油（香港）（135）大強勢，在大行力「拜」之下，股價一度衝上5元，收4.90元，仍升0.175元，升幅3.7%，睇油價升勢仲未到頂，揸住中油已贏梗。五礦（1208）最高搶上2.925元後，敵不住大市急挫之勢，回到2.775元收市，仍算屹立不倒，金屬價格升浪未盡，金屬股仍可看好。
郭兆誠