賓架彭讀書時候唔算用功，成日掛住學影相，喺母校學生會攝影學會嘅黑房消磨不少時光，學習放相、曬相。當年啲同學去課室唔會搵到佢，到黑房就冇乜走雞。
匆匆三十二年，賓架彭今日係大銀行之執行董事兼副行政總裁，係校友之中，銀行界嘅最威水人物，除咗鄭大班之外，應該數到佢，智經陳本來係官，做真正賓架係最近之事啫，可以唔計住，同賓架彭一齊（同班）讀MBA嘅賓架羅渣陸已經退休，亦可以唔計。有人話賓架彭另一位MBA同學SirCK貴為地鐵總裁，都好巴閉喎，但係SirCK雖然係渣打（香港）主席，其實唔係賓架，又唔算。
打工升到咁高級，賓架彭嘅業餘嗜好從冇捨棄，就係燒槍與攝影，至於佢點樣喺日理萬機之餘分配時間去靶場練槍，到外地攝影風景，旁人真係不得而知，左丁山如果學到佢三四成關於時間管理嘅技巧，今日唔使成為瘀血。
母校早知賓架彭嘅攝影技巧巴閉，卒之搵到時間，同呢位校友開一個攝影作品展，名為「山水情」，喺四月二十六日下午四點半於崇基學院行政樓地下大堂舉行，英文就係PassionforLandscapes，顧名思義，攝影展以賓架彭之山水照片為主，佢每年出外取景，中國日本歐美加拿大到處去，捕捉當地特色，看似普通，內含深意，影一幅相，有時需要幾小時。攝影要有耐性，做商業銀行亦需要耐性，各行各業皆有興衰循環，銀行家最忌跟風追求短期利潤，必定要有長遠眼光，逐步逐步走路，賓架彭就深切明白攝影與銀行業務嘅共同道理嘞，佢精於燒槍，更知道銀行家須要眼光準確㖭。
聽日下午賓架彭就忙咯，食完午飯就返母校，四點半主持攝影展開幕，六點前要離開崇基返快活谷跑馬，因為佢有份嘅「勁速猛將」是晚出賽一千米，雖然未必贏得，但既然係短途馬血統，有天生速度，跑入直路之前可能係呢隻馬跑第一㗎，身為馬主當然要入場打氣，表現體育精神啦。