煲呔搞強勢領導，估唔到連大家生唔生仔都關佢事，策發會轄下嘅社會發展及生活質素委員會，噚日就討論政府使唔使積極鼓勵市民生育。
好彩，好多委員依然體會到自由嘅重要，一致認為生兒育女呢家嘢，都係自己搞掂就得啦，使乜政府出手？新婚無耐嘅眼科醫生林順潮都係咁話。林醫生仲自爆同新婚太太喺生仔問題上唔協調，因為佢係來自大家庭，有八兄弟姊妹，一直都好享受大家庭嘅樂趣，所以想生一隊足球隊。就算唔得，生夠一隊籃球隊都好呀。
點知太太就喺國內長大，受一胎政策影響，覺得唔使生咁多，所以林醫生都好頭痛，話要同太太磨合吓，𠵱家都未知幾時傾掂數。如果成事，佢都唔介意做多仔公代言人喎。
傳真︰2623-9278
電郵︰[email protected]