個個黨同組織都呻窮，不過工聯會就完全冇問題，佢哋同教協一樣，識得搵錢，當然工聯會仲有北京大水喉射住，更加水頭充足。工聯會噚日改選，真係啲啲驚喜都冇，鄭耀棠同黃國健連任會長同理事長，新增嘅四個副會長就由譚耀宗、陳婉嫻、梁富華同林淑儀出任，個個都熟口熟面。
相對於工聯會，公民黨就艱難好多，佢哋喺上星期開始展開一連串籌款活動，四大狀以及其他尊貴委員，喺上個周末同周日，更紆尊降貴去到唔同地區嘅街頭募捐。呢兩日熱辣辣，喺烈日下嗌咪，八方都戥班大狀同學者辛苦，就係因為佢哋付出咁多汗水，所以成績都算理想，短短兩日，已經籌到266,727蚊左右，當中有二十萬係大額捐款，有近七萬係喺街頭募捐得嚟。
傳真︰2623-9278
電郵︰[email protected]