眾所周知，拜恩係今季嘅得分王，但係佢原來亦係茅躉王。「81」今季共犯咗14次技術犯規，僅次於活塞嘅技犯鼻祖華萊士（16次）。另外，拜恩亦係繼前隊友奧尼爾後，犯下最多蓄意犯規嘅球員之一，好似迎戰灰熊一役時用手踭兜面撞冧米克米拿。「81」如斯冇體育精神，睇嚟今季嘅MVP都係凶多吉少。
法蘭西斯早走早着
魔術今季在「Frachise」（法蘭西斯）領導下愈打愈糟，點知佢喺二月尾一執包袱過檔到紐約人後，魔術就開始轉運。魔術唔單止係最後22場常規賽打出16勝、6負嘅佳績，其間更連挫活塞、熱火同馬刺連贏8場，差啲趕上季後賽尾班車。如果此子早啲走，魔術話唔定已經入咗季後賽。
第1控衞唔易做
一哥從來唔易做，尤其當你自誇為NBA第一控衞時，更加自討苦吃。馬貝利當年自吹自擂，可能已經預咗俾人寸，尤其係班紐約嘅口水傳媒。不過Starbruy肯定發夢都諗唔到，寸得佢最甘嘅竟然係自己嘅教練。
布朗早前同馬貝利互罵時，向傳媒爆咗句：「佢唔係話自己係NBA第一控衞咩？」一語中的，薑都係老嘅辣！
愈有錢愈呻窮
拓荒者同超音速都因為嚴重財赤，要求市政府泵水救命。奇怪係拓荒者班主係全球五大富豪之一兼「微軟」創辦人之一嘅保羅阿倫；而超音速嘅班主係「咖啡大王」星巴克嘅大老闆舒爾茨，兩個身家都係三世都使唔晒。
佢哋點解唔學另一名富豪小馬班主古賓咁出錢出力，全心全意咁搞好隊波；唔好平時闊佬賴理，蝕錢就賴球迷同市政府唔支持。
深籃
電郵：[email protected]