日股幾乎散500點，港股冇運行，唔見206點。恒指股最醒係和黃（013），有2.35元進賬，但早段高價撲落C輪，到收市時已有蟹味。
中移動（941）與滙控（005），總共拖低恒指137點。唔使太慄，再跌多一二百點，低位買C輪等反彈賺錢。
中移動C輪可以諗定向8月初到期嘅4451落手，輪價0.52元，滙控C輪諗定向7月初到期嘅2228落手，輪價0.59元，兩隻都係溢價相對較低嘅熱門C輪。
網通C輪3627：網通（906）跌55仙，收14.30元，最低見14.15元。估計14元有好強支持力，候跌到14元邊邊，博C輪。正路之選係3627，收21.4仙，跌14%。隻輪12月初到期，溢價4.5%，槓桿率6.7倍（有效4.6倍），引伸波幅34.3%。
中信C輪3525：中信泰富（267）收27.85元，跌半蚊，最低曾見27.20元。
中信搞澳洲磁礦之後，評級提高，遇有回吐，低吸C輪，正路之選係3525。隻輪8月初夠鐘，輪價49仙，負溢價3.8%，槓桿率5.7倍。
正股下周二除息0.80元，計埋股息因素，隻輪都有接近1%嘅負溢價。
3525實際有負溢價，可能同正股近排升得太急有關，市場驚正股短期有回吐壓力。等機會喺45仙左右買隻輪。
章盛