昨日大市急回，原本好多炒得好哋哋的股份突然急跌，尤其係一度成為散戶愛股的永樂（503），上周五剛公布業績，盈利增長不俗，但昨日股價竟然急跌20％，收報3.425元。
永樂除咗跌幅勁，成交金額亦高達1.96億元，令人側目。當小初同班經紀老友議論紛紛之際，突然傳來經紀黃驚叫，佢話永樂上市前的投資者兼保薦人大摩等，再以收市價折讓4.38至5.84％減持舊股，套現近12億銀，股民如果揸咗永樂，今鋪認真唔安樂。
經紀黃話，當日永樂上市時，得到大摩入股，情況就好似蒙牛乳業（2319）一般，令到好多投資者憧憬永樂股價會好似蒙牛咁，有極佳表現。但今次大摩喺永樂急跌後仍然沽貨，外間難免以為佢唔多睇好隻股嘅後市。
小初心諗永樂業績公布後，多間大行包括大摩均調低其評級，所以今次有股東減持唔太意外，但急跌後再配售就好少見。
慕容小初