長和系股價雖然表現堅挺，無奈中移動（941）等一眾藍籌股幾乎全面報跌，長和系獨力難支，加埋市場上頻見有抽水及股東減持行動，市場氣氛一時間變得審慎。
中國永樂（503）公布業績前，花旗預期半年禁售期滿後會有股東減持套現，昨日有大摩等機構投資者試盤，減持套現12億元。
永樂上周五收市後公布05年賺2.89億元人民幣，增長55%，成績唔算差，並公布收購北京零售業務的利好消息，但仍遭各大行調低目標價及投資評級。昨日股價大跌逾20%至3.425元。收市後大摩等仍以4.38-5.84%折讓價，即3.225-3.275元試盤，減持3.692億股。
黑客話，主要股東就算有意沽貨減持，但見股價急挫，通常會收韁唔沽住，但大摩等仍以折讓價減持，似乎相當心急出貨套現，唔通佢哋真係怕內地推出宏調措施？
i師傅則話，大摩唔止沽永樂，噚日佢見到大摩個牌沽咗唔少中移動（941）及網通（906）等內地電訊股。大摩上周發表的報告，話建行（939）上市時，大市跌咗900點，相信中行上市時，大市亦會有類似的調整，已流露出看淡短期港股的態度。
國美（493）大股東早前以每股8.90元減持1.4億股，至今股價仍未重返配股價水平，噚日更一度跌至6.65元，繼續向下尋底，收報7元，再跌6%。承配者若持貨至今，賬面已蝕25.3%。
英皇國際街貨量不足
英皇國際（163）被PentaInvestment增持至15.69%，本來有基金增持屬利好消息，不過呢個基金增持過咗龍，手上15.69%股權連同大股東所持的60.37%，合共76.06%。英皇國際可能要配發新股或由大股東減持舊股，以維持最低公眾持股量。
阿虎