加息周期一日未完，供緊樓嘅小市民，每個月多供嘅錢，累積起嚟真係幾襟計，而供平過租嘅宣傳口號，亦賣少見少。不過，一啲旺區平價樓，條數可能又有唔同計法。
好似中原張珂報料，佢負責嘅九龍灣淘大花園，300幾呎嘅細單位，有唔少樓價低過100萬元，好似早兩日賣出嘅L座中層7室，371呎，93.8萬元，七成按揭供20年，以P減2.75厘計，大概5.5厘，月供4500幾蚊。同類單位月租超過5000銀，仍然算係供平過租。
淘大花園近地鐵，又有商場，起居方便，係東九龍著名上車盤，租務活躍，呎租向來都有十幾蚊。上述單位嘅買家係同屋苑業主，買多層樓畀仔女住，反正租屋同供樓負擔差唔多，梗係供自己層樓好過幫人供樓啦。
原業主20年前用25萬買入，賺68.8萬元，如果舊年初賣，甚至係97年賣，賺得更加盡，不過，樓市係冇如果嘅。