有錢佬好得意，好似畀英國《SundayTimes》選為全球百大富豪嘅新地老三郭炳聯（三兄弟以912億港元身家排第41位），噚日話最想搞喊人，真係估佢唔到。
話說郭炳聯出席「新地開心閱讀計劃」頒獎禮時，當知道高級組冠軍、65歲嘅杜潔銘，寫嘅文章令老婆感動到喊，佢即刻問對方攞料，唔知係咪想學番兩招，用嚟冧吓郭太呢？不過料未攞到，就畀同場中大蔡子強笑佢，話身為大老闆，要令人喊易過借火啦！
郭炳聯話，好耐之前透過公司內聯網，將心水文章同員工分享，而內部培訓部又不時推介新書畀同事，令交流嘅人愈嚟愈多，促成咗呢個閱讀計劃。佢話比較鍾意睇英文書，好似上個周末睇咗EugeneO'Kelly嘅《ChasingDaylight》，仲感動到喊；中文書囉喎，就買多過睇，所以冇乜好介紹。
程志遠攝