古巨基帶病演出饑饉三十閉幕音樂會，喉嚨發炎的他唱至失聲，而發生偷食疑雲的任賢齊，則表示對得住天地良心，自己根本不夠膽偷食，連杜琪峯的壽包都要完成饑饉才敢吃。
古巨基、任賢齊、王菀之及張敬軒等前晚在香港仔運動場演出「饑饉三十閉幕音樂會」，結束三十小時的肚餓生涯，眾歌手在倒數時刻都情緒激動，小齊與基仔合唱《友共情》及《對面的女孩看過來》，又再大合唱《勁歌金曲》，歌手們落台與營友握手，赤腳小齊不慎踩到釘頭幸無恙。
為食鬼捱得慘
基仔因喉嚨發炎，只喝牛奶便吃藥，以致胃痛，前晚他出力獻唱完畢後終致失聲，他以微弱聲線吃力地說：「我胃痛又頭暈，又心律不正，個人好唔舒服，不過終於捱完三十個鐘，好辛苦，真係好感受到飢民嘅慘況。」
小齊日前發生偷食疑雲，他前晚表示只喝了六盒朱古力奶頂肚，以致早上起床肚痛，他又說：「我可以對得住天地良心，真係冇偷食，我覺得自己好天下無敵，因為我本身好為食，捱得好辛苦，最鍾意食海鮮，去杜琪峯生日會，佢哋仲特登整龍蝦炒飯畀我，但我真係唔夠膽食，杜生見我唔食嘢，連壽包都幫我打包，等我食得時可以食番。」
衞詩蛋糕誘感
張敬軒與王菀之公開拍拖後，前晚手拖手以情侶檔出場獻唱，十分甜蜜。而衞蘭接受訪問時則表示認識了一些營友，獲贈手鏈，十分開心，她打算每年都參加饑饉，她又表示回家繼續捱餓時，其妹衞詩竟拿韓國的朱古力蛋糕誘惑她，故她打算明年與妹妹一起參加。
採訪：胡比 攝影：葉君海
