曾特首同曾太喺海南島三亞遊玩完，噚日下晝甜甜蜜蜜拖住手仔咁返香港，佢兩個就開心快活啦，難為班記者喺度日等夜等，希望影到佢哋一啲有趣嘅照片之餘，更加希望佢回心轉意，唔好臨時縮沙兼甩底，六月二日唔去記協個周年晚會，改由肥龍做替身，等大家一場歡喜一場空。
都係八方把口唔好，上日大讚煲呔夠薑敢於六四敏感時刻，答應做記協Ball主禮嘉賓嘅同時，仲重提啲唔吉利嘅舊事，唔知係咪咁嚇襯曾太，勸佢夫君唔好冒險。
擦鞋事小被玩死事大
八方噚日問特首辦，佢哋猛話未有最後決定，總之如果特首當時人在香港，就一定履行諾言會去，言下之意即係話如果佢出咗埠就冇法子，幫記協唔到啦。特首出訪，梗係大過天，不過假如你一早mark咗個日曆，六月二日星期五要留喺香港去記協Ball，咁就唔應該再食人家茶禮。
𠵱家最慘係記協，正式係好女兩頭瞞，一方面就猛咁同人勁sell特首畀面，各位商界有機親近煲呔，任你拍照，包枱值回票價；另方面就啞仔食黃連，有苦自己知，就係佢老哥分分鐘甩底，好似前年唐唐咁，自己忽然帶團去咗東北，叫肥馬做後備頂上。
煲呔今次嫁又唔嫁，大跳草裙舞，有自命高人就分析，可能因為時近六四，佢怕敏感，但係呢個一早知道㗎啦，六二比六四早兩日，唔使搞咁耐先計到條數；於是有人就估係因為程翔事件，記協喺報紙登咗個大廣告，佢怕當晚被人圍住問，唔知點答喎；當然最可信係佢怕咗司儀黃毓民，你知啦，毓民見到煲呔，一定唔會留手，一時講吓商台，一時講吓港台，仲一定提程翔同六四，咁煲呔咪真係搵地方匿都唔掂，正所謂捐錢擦記者鞋事小，被毓民玩死事大，於是思前想後，都係不去也罷。
八方希望自己係小人之心，煲呔唔係咁冇口齒嘅，況且已經有人拍心口話會說服毓民當晚封嘴，一切尷尬嘢唔准問，咁煲呔可能唔出埠避災。記協Ball要記者封嘴，都算經典，與其係咁肉酸，不如煲呔自己出封信，叫已經book咗枱嘅有關人士千祈唔好要記協回水（已經賣咗四十席），見肥龍等於見佢，將來一定有回報，請番大家去禮賓府遊園睇錦鯉又點話，總之放過佢一次啦。
傳真︰2623-9278
電郵︰[email protected]