被中國拘留一年嘅程翔，原來無被市民忘記，由程翔舊同學組成嘅程翔事件關注組話，好感激傳媒咁落力幫同行，難怪好少露面嘅程太劉敏儀，早前都特別向新聞界致謝。
八方前日寫過，如果中國政府要玩程序，程翔歸期肯定遙遙無期。講到呢度，關注組成員之一，本身為律師嘅許天福好感觸，話梗係想老朋友早日返嚟，可惜真係好難知幾時得。佢好詳盡咁向八方解釋，程翔案雖然喺三月中第二次由國安機構移交檢察院，檢察院最長有一個半月時間決定係咪可以起訴，但只要局方話案件發現新證據，又可以重新進入調查程序，又或者向人大申請延長調查，聽落聽落，就知道案件根本無死線可言。
八方記得上年7.1遊行，劉敏儀都有喺維園擺檔賣書，又發起黃絲帶行動，希望更多人認識同支持程翔。如果程翔7.1未歸，相信黃絲帶行動今年都會繼續。
傳真︰2623-9278
電郵︰[email protected]