寫字樓一族梗要有一兩包「口立濕」傍身，話梅、薯片都食厭？奇華餅家新出的「茶薄片」有4隻口味，包括香片、紅茶、綠茶同烏龍茶，拆開包裝已經聞到茶香，每片曲奇又夾雜茶葉抹碎，淡淡茶香清新撲鼻，真係好過成日食其他無益零食，每包有8片，薄薄一片OL食就啱啱好！
奇華餅家（21997606）
尖沙嘴漢口道25-29號地下A1號舖
肥平：為食狂，肚腩大過頭，乜都擺入口。
夏日推介「菓然美味」
天氣開始熱，搞到我瘦東都無乜胃口食嘢，呢個時候最好食生果降降溫，不過齋食生果有啲悶噃！我咁嘴刁，食生果都要食得刁鑽過人！近期帝苑酒店中菜廳帝苑軒炮製咗個「菓然美味」菜譜，用榴槤、荔枝、芒果等鮮果配海鮮、肉類及蔬菜等材料，入口酸甜醒胃，心情都靚番。我就最鍾意當中的「百花釀荔枝」、「榴槤脆皮海鮮卷」同「香蕉焗牛柳粒」喇！
帝苑軒（27242666）
尖東麼地道69號帝苑酒店B2層
瘦東：嘴刁唔貴唔食，貴夾唔飽開正佢嗰瓣。