編輯哥哥話我怪，身為女仔竟然鍾意睇機械人片！想當年最愛大鐵人17號，我為佢被打倒而喊過；另一至愛是水桶身材的鐵人28號，偏偏就是鍾意佢打得夠笨拙！早前鐵人28號拍成真實版電影，真人演繹加CG，Fans肯定受落。啊，都好耐無講過呢一句：「去啦，大鐵人！」
記者：招佩珊
日本動漫界大師橫山光輝，與手塚治虫同期出道，他的《鐵人28號》同手塚治虫的《小飛俠》開創日本機械人動漫界的兩大主流，《鐵人28號》更是巨型機械人漫畫作品的元祖。《鐵人28號》曾多次改編成動畫同真人版電視劇集，較近期的新作已是2004年喺日本播放的第4部電視動畫。其實，近年日本已流行將動漫畫或特攝作品，透過CG技術搬上銀幕如《加美拉》、《TOUCH》、《幪面超人TheFirst》等；《鐵人28號》的寫實版電影並未有喺本地上映，今回港版3區DVD登場，動漫迷點可以錯過呢部經典之作？
CG加工場面真實
電影版可當獨立古仔咁睇，最初金田正太郎仲未成為鐵人28號的操控員，不過有日東京受到機械人黑牛襲擊，一個叫綾部的神秘人出現，要正太郎操控鐵人28號跟黑牛決戰，原來鐵人28號是正太郎已去死的爸爸所研發，於是正太郎當上操控員，完成爸爸維護和平的遺願。過往，曾經睇過啲假得難以令人信服的漫畫寫實版，難得《鐵》的真實感高，CG機械人與實景夾得埋！比如黑牛對拳頭喺馬路上亂飛、兩個機械人喺大廈之間肉搏等場面，至少唔覺係一堆模型，呃得吓觀眾！
拳來拳往慢三拍
近2小時電影，28號同黑牛激戰兩回合；第1回合機身還是灰色28號，不敵黑牛搞到甩皮甩骨；改裝後戰鬥加強，與黑牛勢均力敵。所謂激只不過是拳來拳往，仲要近3秒才打出一拳，行路、閃避、打拳、跌倒，每個動作慢吞吞，笨拙到震，但反而成為笑料！你話我低B都好，見佢哋左直拳打心口，右勾拳打頭，有一幕黑牛見28號當機唔郁，輕輕篤佢個頭一下，28號呯一聲倒地，動作低能但搞鬼，我就笑到肚痛！
電影中演員卡士唔弱，主角正太郎是由曾於荷李活電影《最後武士》飾演小雪兒子的池松壯亮扮演，正太郎爸爸由阿部寬飾演，媽媽是女星藥師丸博子，而妻夫木聰亦有份做串星扮街頭小販。
超逼真CG夾實景
DVD售價：$70
區碼：3區
語言：粵語、日語
字幕：繁體中文
發行：亞洲影帶
