響九十年代樓市瘋狂時期出產嘅夾屋（夾心階層住屋），近年已較少人提及，其實二手市場都有一定交投。據中原地產統計，3月份嘅夾屋二手成交有20宗，總值4400萬，不論宗數及金額計都創下近5個月新高，相信係同整體二手樓市轉好有關。
據講，3月份二手成交宗數最多嘅夾屋係馬鞍山雅景臺，共5宗買賣，總值1016萬元，即係平均每伙200萬左右；其次係青衣宏福花園同鑽石山悅庭軒，各有4宗成交，總值分別係976.8萬及883.8萬，即係平均每伙約244萬及221萬。
呢段時間嘅夾屋二手成交，有17宗平均樓價過200萬，好似宏福花園一個低層單位成交價278萬，悅庭軒同類單位亦要265萬，反映優質二手夾屋樓價，已經同低價二手私人屋苑睇齊。
不過咁，由於1及2月農曆新年假期市淡，第一季夾屋二手成交宗數仍算偏低，遲啲可能更旺。