早兩日收工返屋企睇報紙嗰陣，見到有一則新聞話有爭取的士權益團體，將會組成糾察隊，在機場範圍內專捉違規經營機場接送服務的白牌貨Van。睇完之後，我真係好佩服這班的士業界團體，連身邊朋友都話佢哋真係堅，可以為了保障自己的飯碗，夾錢去請私家偵探和組成糾察隊來對付違規經營的白牌貨Van。不過，掉返轉頭嚟諗，先前才有正當的士司機接受訪問，話「八折黨」和「泥鯭」的士害得他們無啖好食，查實呢啲都算係違規經營吖，又唔見話呢班爭取權益的團體去組成糾察隊捉佢哋？另外濫用政府發出的Permit，肆無忌憚在禁區、甚至黃格停車等客阻礙來往交通，連警察行過都當人透明，唔知又會唔會有糾察隊去捉佢哋呢？哈哈，大家睇完之後肯定覺得我係一個逢的士司機必鬧的人，但係Sorry喎！我針對的只是一群態度差劣，只懂痛罵別人不是嘅的士司機，因我相信這僅是一小撮人，好嘅的士司機仍是佔上行業中的大多數。
記者：鄭達基