行會今日復會，好多議員之前趁假期出埠鬆一鬆，陳智思（Bernard）都有外遊，不過，佢唔係去玩，而係專程去美國驗吓個心。驗就只係驗咗三粒鐘，不過飛來飛去頭尾唔見咗幾日時間，而且最慘情就係架車車頭玻璃無端端被人打爛，連個背囊都被人偷埋。
陳智思都認自己係含住金鎖匙出世，家族喺泰國好顯赫，偏偏佢十八歲喺美國讀書時發現患咗個血管收縮病，除咗做心臟手術同食藥之外，不時仲要飛去美國檢查，今次見行會立會休假，就去check吓。
結果醫生話佢冇事，本來好值得慶祝，佢諗住幫老婆去超市買埋包arrowroot（葛粉，係鷹粟粉嘅代用品，健康好多，低卡、有營養又易消化，亦貴好多）帶返香港。點知佢老哥唔知係咪太開心，泊低架車之時諗住快快手買完出番嚟，於是將個背囊放喺坐位冇拎。咁就引人犯罪啦，啲賊仔以為發達，打爛佢塊車頭玻璃偷咗個背囊，Bernard攞住啲arrowroot激到跳起。好彩只係唔見咗幾件新衫同埋屋匙，啲證件同錢都冇失到。為咗包粉被人偷晒啲嘢，真唔抵，但Bernard講到佢冇得頂，比傳統豆粉有益，可惜香港冇得買，要去美國入貨。如果真係咁正，黃又又如都應該考慮入番啲貨。
Bernard呢輪其實心情靚絕，皆因大眾財務（JCG）以四十五億至好價買咗佢間亞洲商銀，大家都讚佢叻仔，雖然啲錢未袋落袋，但係斷估啲大馬佬都係有信用之人，唔會唔認賬。
傳真︰2623-9278
電郵︰[email protected]