大陸消費股概念似乎尚未炒完，雖然近排部份股份出現回吐，但普遍仍處於高位，反映芬佬仍然buy呢個概念。
好似金鷹商貿（3308），近排就見摩根大通頻頻增持。至於喺大陸搞內銷同做OEM嘅鞋股永恩國際（210）剛公布業績，盈利急升44％至2.55億元，業績靚成咁，難怪芬佬唔捨得放手，永恩上周五收報5.10元，冇起跌。
經紀陳話，如果鍾意內需股，可留意一隻較冷門的藍頓國際（245），隻股上周以0.118元定價，向兩個外國基金配股，集資5000萬銀，用嚟喺大陸搞零售同分銷之用。配股後股價急升，上周五升2.87％，收0.179元，兩個基金賬面賺到笑。
經紀陳話，藍頓喺大陸經銷化妝品、健康食品產品、教育設備及其他電子及保健器材業務，成間微型百貨公司咁。
但同一般百貨公司唔同，佢哋嘅市場推廣及銷售活動，大部份透過電視及郵寄目錄方式進行，喺同類股中比較少見。
慕容小初