早排中新社訪問查史美倫，話查太將會做「兩家機構」嘅董事，相信呢個禮拜會揭盅。其中一個傳到開晒巷嘅，係政府諗住委任佢做港交所董事，呢個禮拜三股東會後就會公布。至於另一個位，原來係交通銀行非執行董事。
交行喺6月22日，會喺上海舉行股東周年大會，到時就會選董事，其中王冬勝會競選連任非執董，而查太就係新候選人，如果佢順利入圍，將會成為交行董事會內，唯一女將。
行情起跌
其實，查太入局相信同佢身兼滙豐銀行獨立非執行董事有關，滙豐作為交行嘅策略投資者，梗要搵人睇實檔嘢，連同王冬勝及滙控獨立非執董馮國綸已經係交行董事會，加埋交行副行長葉廸奇，將會有四個滙豐代表喺交行。
查太自從前年10月獲老董委任為行會成員，嘅行情一度令人看漲，點知唔夠半年老董就落台，煲呔上場，成個局唔同晒，查太喺行會分工嘅名單中，連佢最熟行嘅財經事務都冇得沾手，只係負責經濟發展及勞工，同埋環境運輪及工務。就算證監會同港交所主席要轉莊，以查太做過證監副主席，呢兩個監管機構嘅主席位都輪唔到佢，可幸嘅係查太做過中國證監，喺內地仲有個中國證監會國際諮詢委員會副主席嘅職位，都未算投閒置散。
李華華
讀者如有任何意見或報料，歡迎發送電郵至
[email protected]。