長春社噚日搞咗個環保野外定向，搵咗民主黨、公民黨及中西區區議員等做嘉賓隊，民主黨由達仔領軍（隊員有馬丁、單仲偕同馮煒光），公民黨就由民主肥女神譚香文帶領。肥女神都算係咁，帶領公民黨贏到創黨後首個獎項，快過民主黨到終點。
民主黨認真失威，但佢哋就唔認係輸。馮煒光話，佢哋都係志在參與，冇話一定要贏，大會要求佢哋去三個點，但佢哋就去多一個，如果唔係咁，一早就贏咗啦！
呢個叫做「環保熱點大追蹤2006」嘅活動噚朝喺香港公園揭幕，請到馬會主席夏佳理做主禮嘉賓，有四個環保熱點包括天星碼頭及動植物公園要去，嘉賓隊本來去三個就得，點知民主黨去齊四個，比去三個嘅公民黨遲咗成半粒鐘，咁民主黨要讓賽，冇法啦。
民主黨噚日輸咗牙骱戰，不過呢啲都唔重要，最緊要係特首選舉戰可以連成一線，搵夠一百選委提名個候選人同煲呔選過。八方聽聞，資訊科技界嘅單仲偕今日拉頭纜，下晝放工時間會企喺鰂魚涌太古對開天橋叫咪，提啲選民記得要登記，正如單雞講，「間接」選特首嘅機會都唔應該錯過。
傳真︰2623-9278
電郵︰[email protected]