上個禮拜四晚，孫柏文喺編輯姐姐強力鞭策之下趕稿，咁編輯姐姐每一次拔鞭嘅時候，都會令我隻金手指喺電腦鍵盤上猛㩒alt+F4，將所有無關痛癢嘅網頁關掉，等我可以專心寫稿。當晚，我不問世事咁寫咗一篇同大家分享我對江西銅業以「對沖」為名，不過拋空為實嘅感受。特別係我睇住金銀銅價日日升，同埋江銅做賣銅生意，都好似對銅價冇信心，係咁拋空啲銅嘅感受。
交稿之後，吐晒啲苦水，舒服好多，我亦變身成為「白銀文」，去開吓金銀銅報價網頁，睇吓嗰晚白銀升咗幾多。睇下白銀文領軍嘅白銀戰隊，點樣再一次教訓建制裏面，想陰謀掩飾紙幣購買力不停削弱嘅「紙幣狂魔」。點知，一開網頁，紅墨氾濫，金銀銅價全面報跌。白銀最傷，由禮拜四全日最高位14.75美元一盎斯，跌至12美元一盎斯。白銀文一睇到電腦螢幕顯示-18.6%呢個數字時，就好似心口俾紙幣狂魔大大力咁打咗一鎚，白銀文繼而應聲倒地，大叫：「帝國反擊戰啊！」
拋多啲拋多啲
跟住翌日，即係上個禮拜五，紙幣狂魔加多一腳，踩住已經倒地嘅白銀文個頭，將銀價進一步推低，至11.64美元一盎斯，仲要大大聲問白銀戰隊眾「武士」：「Who'syourDADDY？」當時，白銀文個頭被踩到連個口都開始流出液體。大家睇到呢度，一定會以為白銀文個口流出嘅液體係血，不過大家唔使驚，唔係血！係口水！
銀價11.64美元一盎斯喎，我仲唔流晒口水，即刻入貨咩！點知，到孫柏文嗰隻金手指有機會去銀行?錢，銀價已經被黃金同銅價回升帶動，升到13美元一盎斯，白銀文錯失咗今次入市良機。即係話，上個禮拜白銀完全冇郁過，一周開市同收市都係13美元一盎斯。
再講，聽白銀戰隊隊員收嘅風，喺香港時間上個禮拜三晚，紐約商品交易所（Comex）召開咗緊急會議。我估十成十係傾啲大行拋空黃金同白銀俾人夾倉點樣解決，淨係大行拋空咗嘅白銀，都多過全球每年白銀產量，如果同大行對賭，買白銀嘅投資者要呢班大行交實貨白銀出嚟，大行仲唔通街搶貨？咁白銀仲去唔到孫柏文嘅目標價120美元一盎斯？除咗搶貨，大行另一個可以解決「拋空太多白銀」問題嘅方法，就係再拋多啲白銀出嚟壓價，等啲用孖展買銀或者買咗紙上白銀嘅人投降，大行仲可以賺大錢㖭！咁你明白點解我成日叫大家買實貨白銀啦？冇錯，就係要夾死啲大行。
經濟學家好迷惘
咁到禮拜四晚，紐約商品交易所嘅大行金銀銅出市員收到指示，收埋隻手，完全唔接貨。搞到金銀銅好似飛機遇到氣流咁，忽然急跌。不過到禮拜五晚，金銀銅好友就上演咗一齣「武士復仇」，金銀銅全線造好。我相信大家都想知道今個禮拜會點？最慘我唔知。不過都係嗰句，隨時都係入市買實貨白銀嘅好時機。
最後，孫柏文唔知道地球上邊個係《金手指》嘅fan屎，不過我知道起碼有一個人唔睇《金手指》，呢個人就係摩根士丹利亞洲首席經濟學家謝國忠（AndyXie）。佢係4月21日話:「Silverisupby58.1%thisyear.Nobodyhascomeupwithastorytoexplainit.Theraceisontoseewhocancomeupwithaplausiblestoryquickest.」大約可以繙譯為：「白銀今年升咗五成八。不過我唔知點解！點解？點解呀呀呀？！」
我見到有人咁迷惘，我都好難過。希望關心Andy嘅《金手指》fan屎，送份《蘋果日報》畀佢，叫佢日日睇實《金手指》啦！等佢可以同你哋呢班《金手指》fan屎一樣咁醒！
孫柏文