興建添馬艦政府總部變成政治角力賽，政府為爭取議員支持，話將來新建樓面有兩成係地庫，以降低建築物高度。地庫是否環保？建築師學會會長/中大教授林雲峯不以為然，佢認為興建地庫，除咗成本高五至七成之外，亦達唔到環保目標。呢個世界真荒謬，起樓明明係好專業嘅，啲立法會議員之中，除咗劉秀成教授，邊一位係建築師呀？但最大聲嗰班人就係其他議員，劉教授好似冇聲出噃，他日新政府總部如果起到好似中央圖書館咁，該煨咯。
好多人唔識就充內行，但唔好以為行內人就係專家。呢日在皇朝會食飯，窗口對正添馬艦及填海區，亦望到西九龍。我哋從添馬艦，西九龍講到東九龍啟德機場之發展，物業Y話：「西九推倒重來，添馬艦拖拖拉拉，啟德機場唔知會唔會再曬多十年太陽！」左丁山話：「唔會啩，近日報道話政府已經鐵定喺啟德興建郵輪碼頭喎！」物業Y講：「唓，據我所知，整體規劃（masterplan）都未有，啟德將來點樣發展，如何配合沙中線，起唔起運動城，都未有人知，郵輪碼頭要等多幾多年先至會出現呀！」等吓好似無妨噃，香港特區政府與財團好識發展地產，地皮曬太陽愈耐，升值愈高，起碼大家都係咁諗，郵輪碼頭，邊個識呀？等多十零年咪一樣！
物業Y嘆一口氣：「係咁樣心態先至害人。紐約市為咗興建郵輪碼頭，市長彭博提出極優惠條件，用兩億美元利誘郵輪公司，要求從速在紐約市興建郵輪碼頭，星加坡政府亦勤力游說郵輪公司到星加坡，只有香港特區政府唔嗲唔吊，慢吞吞。」一位同席人士插嘴：「其實旅遊界郵輪界應該一早游說董特首，佢係航運界人士，對郵輪認識一定多過曾先生啩！」
一位老闆大笑：「當年有人同董特首傾過，董先生話最好由ShipownersAssociation（船東協會）提建議，於是有心人加入船東協會與主席董先生傾。船東協會只對興建十號碼頭有興趣，貨櫃碼頭點同郵輪碼頭呀！」