吳彥祖自編自導自演嘅《四大天王》，口口聲聲就話係紀錄片，將自己同尹子維、連凱同埋陳子聰合組alive嘅過程，拍成電影。為咗呢部戲，佢哋先係作嘢話新歌俾人盜錄上網，然後將呢單流料放畀某報女記者博同情，仲將對話內容偷錄擺喺部戲入面，之後佢哋又扮反面博宣傳，真係乜嘢誠信都冇晒！
抄22年前舊片
好喇！搞咁多嘢，上個星期四正式上畫，有人睇完之後就猛讚吳彥祖有創意，仲話一隊組合喺娛樂圈打滾嘅真實面貌條橋好新鮮，其實咪又係抄？早喺一九八四年美國已經有部電影叫《ThisisSpinalTap》，內容都係以紀錄片形式，講一隊搖滾樂隊點喺樂壇打滾，唯一唔同嘅係，SpinalTap呢隊Band係虛構嘅。
失晒誠信兼玩埋抄橋，結果開畫當日都係收得嗰八萬蚊，吳彥祖證明咗自己冇票房保證之餘，連信譽都輸埋，以後佢哋講嘢都唔知仲有冇人會信。
此外，alive前晚一行幾人到添馬艦捧陳子聰個老婆何超儀場，尹子維依然唔怕被人話佢勾義嫂，不避嫌同Amanda搭住膊頭風騷合照，似乎又係為咗博宣傳居多。