嫻姐喺今個復活節認真happy，事關佢同埋近十個屋企人，齊齊孭住背囊去法國自由行，其間足迹遍布巴黎、普羅旺斯同尼斯等地，沿途仲欣賞到好多著名畫家嘅作品，所以嫻姐上星期返到嚟香港，都覺得自己好有文化藝術氣息。
話明係背囊團，行程一啲都唔疏乎。原來個團最大年紀嘅一個人，就係嫻姐家姐，成六十歲；緊隨其後嘅，就係嫻姐自己。講到呢度，嫻姐都笑笑口話：咁你就知幾辛苦啦，因為背囊團真係好考腳骨力㗎。
就係因為日日都要行來行去，差唔多每日步行時間成七個幾小時，嫻姐話雖然都有歎過希臘菜、意大利菜甚至中國菜，而且又不時買啲零食醫肚，但自己一啲都無肥到㗎。
話時話，今次去法國，原來有段古。嫻姐細佬喺法國生活過，所以今次可以帶佢哋四圍捐。有個咁好嘅領隊，怪唔得嫻姐咁滿意啦。
傳真︰2623-9278
電郵︰[email protected]