想食大閘蟹？未到中秋都仲未係時候，不過對於一眾蟹癡嚟講，可以先食吓本地蟹止一止渴。其實本地蟹亦有膏蟹、肉蟹等，全屬青殼蟹，而揀嘅時候亦要揀蟹身同肉質結實為好，當然新鮮就至重要。
蓋邊無空隙屬正蟹
若鍾意食蟹膏嘅蟹癡，可以選擇雌蟹，揀嘅時候可以將蟹對住燈光，如果見到蟹蓋邊緣係黑色，即代表無空隙，咁就證明呢隻就係份量十足嘅膏蟹，否則就代表蟹膏不足，俗稱叫花膏。不過若果無足夠光線，亦可用手去檢查，只需輕按蟹嘅底部，若見到有紅膏突出就代表正蟹啦！
半透明腹部質較差
鍾意食蟹肉可以揀雄蟹，揀嘅時候要重手，仲要以腹部兩側有粉白色為佳，若果腹部呈半透明，摸上手較軟多水份，這便是「水蟹」，品質較差。食膏蟹，多以清蒸才會原汁原味，而肉蟹則可以用薑葱來炒，非常惹味。不過千祈唔好貪圖鮮味而食未煮熟嘅蟹，如果唔係好易惹肝炎㗎！