港股自月初升穿16000大關阻力後，3個禮拜內急升近1000點，成交大增，股市已進入消耗性上升期，亦即係派發期，但重申一句，唔代表恒指唔會再升，正如上周四話齋，未來的大半個月，市場仍然會好旺，即使係中期見頂回落，整固完成後，新升浪再起，仍有機會再創今年新高。呢個係大時代，機會難逢，千萬不要錯過。
上周五調整市，哈爾濱動力（1133）同中油（香港）（135）都逆流而上，尤以前者的升勢最為急勁，哈動派完成績表，引來好消息回吐，一度低見6.15元，但連續急彈兩日，最高升到7.90元，高低價一計，升幅28%，好和味。
中油上周五受外圍拖累，早段低開4.425元，但消息話佢會再開車，果然見大行由低位一路買番上去，臨尾段掃貨之勢更急，結果高收4.725元，逆市而升2.7%，低位兜到貨，又可穩坐釣魚船，可以上移止賺位繼續持有。
五礦資源（1208）亦係早段「坐一坐」，做過2.675元，收市上番2.775元，跌5仙，上周五金屬價格在外圍出現V形急彈，3個月期鋅升235美元，又創出新高，對五礦股價應有刺激。五礦06年（12月年結）盈利估達7.2億元，每股盈利0.43元，以保守預測的PE8倍計，股價已可見3.45元。
今年業績有望改善
駿威（203）業績比市場預期遜色，股價由高位回落頗多，但落到20日線（3.25），同50日線（3.22元）已有支持，預測06年（12月年結）盈利可恢復增長，現水平趁低吸，中線可望獲利2至3成。
駿威05年盈利19.05億元，跌7.6%，每股盈利25.4仙。期內增持廣州本田股權由47.5%至50%，但應佔盈利反由20.77億元減到19億元，主要係本田要減價爭取市場，盈利率由14.9%降至11.8%。
06年，廣州本田計劃銷售26萬輛，增加13%，與中國汽車工業協會估計的增幅10%至15%相若，加上虧損的裝嵌客車業務已出售（去年影響每股盈利0.8仙），而市場預期今年車價亦不會再大幅調低，估計盈利可回升到22億元，每股盈利0.30元。
廣州本田新廠下半年可投產，年產量可增一半至36萬輛，花旗集團報告指駿威銷售將會加快，目標價由3.40元調高至4.20元，維持「買入」評級。
郭兆誠