李嘉欣昨日聯同近千名公公婆婆出席香港柏金遜基金的活動，集體耍太極籌款，嘉欣表示因其外婆同樣患上柏金遜症，故樂於擔任是次活動的大使。嘉欣的外婆雖然手腳不太受控制，但頭腦十分清晰。
李嘉欣昨日到石硤尾公園體育館出席「愛心太極操」活動，更以「太極操愛心大使」身份擔任頒獎嘉賓，大會安排近千名公公婆婆到場耍太極，籌得三十八萬港元善款。問到嘉欣閒時可有學耍太極？她說：「我份人比較心急，而太極要好有耐性，所以我都係比較鍾意跑步呢類運動多啲。」
嘉欣表示能夠擔任該大使十分高興，而是次出任大使最大的推動力來自外婆，她說：「因為我婆婆成九十幾歲，而且佢都係患咗柏金遜症，咁去做呢個大使覺得好有意義。雖然婆婆手腳唔係好靈活，但佢嘅頭腦好清晰，好多醫生都話耍太極對呢個病好有幫助，可以減輕病情。」
拍彭浩翔新片
嘉欣不時大讚家中的外婆精靈，十分關心身邊的事，特別是嘉欣的緋聞，嘉欣說：「佢一見我換手提電話都會留意到，仲會問我。有時佢睇到報紙見到我啲唔好嘅新聞，都會開解我，叫我唔好唔開心。」
此外，嘉欣表示稍後會接拍由杜汶澤及彭浩翔執導的電影，問到她是否想攞獎時，她說：「套戲都未拍，唔會做呢啲幻想。」說罷嘉欣即改口表示閒時喜愛幻想，似乎非常想攞獎。
採訪：何永寧 攝影：陳順禎
