喺銀行嘅宣傳推廣或運動場合上，見到渣打大班蘇利民一啲都唔出奇；不過當有一日大家喺分行櫃位見到呢位高層招呼你，亦唔使驚奇。話說渣打內部有個叫做「FirstHandDay」計劃，04年尾實行，由前香港一哥戴維斯（MervynDavies）諗出來，主要係鼓勵平日高高在上嘅高層，去體驗吓基層同前線員工嘅工作。
呢個計劃，淨係高層先有得玩，玩得最多嘅，睇怕都係蘇利民，事關佢已經玩咗五次，去過分行、熱線中心、付款中心等部門，最近嗰次喺3月，去咗觀塘貿易押滙部。
雖則話體驗吓，但梗唔使蘇利民落手落腳（出手咪盞搞亂檔），佢只要坐喺個員工身邊，睇實佢點做，之後就寫番自己感想，喺內部刊物同大家分享有乜得着。蘇大班點諗華華興趣唔大，反而好想知嗰位被佢昅實半日嘅員工，有乜感受啫。