賣炮仗藤籃起家嘅利豐集團，經歷兩三代人努力，已經成為一個大企業，同香港人生活息息相關（OK便利店大家都成日幫襯，玩具反斗城亦係佢哋嘅生意），馮家亦成為望族。今年，利豐慶祝開業一百周年，慶祝活動可以話係一浪接一浪，早兩個月先出咗本《百年利豐》打頭炮，捧吓自己，亦補番一頁歷史。上個月又包起迪士尼，請員工玩餐飽，至於公司小股東當然亦有好處，就係收紅股。咁都未算，馮國經馮國綸兩兄弟噚日再出手，今次輪到莘莘學子受惠，佢哋私人科水一億港元設立獎學金，話要培養中港兩地大學生做「馮氏學者」，認真大手筆兼疏爽。
馮國經係香港出生，美國成材，呢位哈佛經濟學博士曾喺哈佛教書，一直支持教育，公司內有一個模仿哈佛講堂嘅會議室，八方都喺嗰度聽過馮教授演講，佢𠵱家雖然係「業餘老師」，但以利豐老闆、機管局主席、港大校務委員會主席身份，真係教乜都夠資格，莫講做教授，做特首都冇問題。
講番呢一億港元獎學金，其實係來自「利豐（1906）慈善基金」，而個基金嘅錢，就由馮國經及國綸私人捐出，佢兩位亦都係個基金董事。八方噚日問過利豐方面，佢哋話個基金家吓仲同啲院校傾緊撥款細節，希望九月可以正式派到錢出街，反應好鬼熱烈。梗係，本地大專院校咁水緊，有捐助有錢收，睇怕都無乜邊個唔開心啦！據八方所知，除咗本地八間大學之外，入圍嘅國內大學，都係大家熟悉嘅，有番咁上下名氣，正式名單就要遲啲公布。
十年就有一千個自己友
咁啲錢點派法？各位大學生聽住啦：中選者會被命名為「馮氏學者」，可以揀去定居地以外嘅大學交流，時間最長一年，名額每年一百個；個基金只係負責派錢，以及監管啲錢點使，選人及其他細節，就會由大學方面自己做番。假設中港兩地五五波，咁香港一年就有五十個大學生有機會得到資助去海外讀一年書。
咁點先可以攞到「馮氏學者」呢個朵呢？成績要標青之外，最好就兼備領袖才能，咁先至配合利豐一直標榜嘅企業家精神。計八方話，對得獎者嚟講，啲錢邊度嚟，去邊處交流都唔重要，最緊要係掛住「馮氏學者」呢個銜，第日搵工做一定容易好多，如果入利豐睇怕肯定有優先權。至於馮家，每年有人幫手去栽培一百人做「馮氏學者」，十年就一千個，好過要個乜嘢學院命名權咁cheap啦。
傳真︰2623-9278
電郵︰[email protected]