立法會主席范徐麗泰、議員郭家麒同陳智思之間嘅政治立場迥異，平時喺立法會成日開戰，但噚日就難得企埋同一陣線，齊齊呼籲市民支持「捐器官我願意」活動。而公務繁忙嘅特首曾蔭權雖然出席唔到，但都錄咗段聲帶支持呢個活動，仲話自己都已經同家人表明咗捐贈器官嘅意願㖭！
除咗例牌嘅呼籲，范太仲分享咗一段往事，原來思想開明嘅佢十六、七年前已經簽咗器官捐贈卡，點知當年佢嘅屋企人竟然齊聲反對，話「我哋都唔想你死咗之後一忽一忽」，搞到范太不知幾咁無癮。好在自從范太捐咗個腎畀個女之後，大家嘅諗法都唔同晒，𠵱家成家人都好支持器官捐贈㖭！
傳真︰2623-9278
電郵︰[email protected]