香港人崇日崇到出晒面，日本料理開到成行成市，但食埋啲嘢間間差唔多，無乜新意喎。早前小記就喺紅磡搵到一間的的骰骰嘅日本料理takeaway，麻雀雖小，勝在花臣層出不窮，有無諗過壽司、刺身會同煎、炸、韓式泡菜醬有關？佢哋出招不按章法，總之創意無窮嚇死你。
記者：周樺婷
攝影：何家亮
鎮店之寶
壽司三兄弟$33/1客
用串燒作壽司都係第一次見，賣相極討好的鎮店之寶，球形飯糰上的魚生代表店主三人的不同性格，別具心思。
睇準TakeAway市場
店名叫「漁樂大家」，原來背後有個幾有趣嘅原因。店主肥仔樂娓娓道來：「我哋主打魚生壽司同刺身，漁民食嘅海鮮永遠係最新鮮嘅，我哋就係想將呢種漁民獨有嘅樂趣帶畀大家。」唔係得個講字，當日小記就親眼見證佢哋同魚生供應商周旋，唔係想來貨平啲，而係睇吓搵唔搵到再新鮮啲嘅魚生。咁有heart嘅店主邊度搵先！肥仔話：「全因自己好鍾意食好嘢！」講得好！簡直就係想開食店嘅人嘅金玉良言，首先要自己鍾意食，先有心整最好嘅畀食客。至於點解主攻takeaway外賣？原來有晒市場計算，𠵱家年輕夫婦、同居男女愈來愈多，佢哋唔願自己煮嘢食，又唔想晚晚出街食，所以takeaway生意大有市場，加上鄰近Poly宿舍，食埋大學生唔煮飯條水，事實亦證明佢哋愈做愈旺。
壽司三兄弟最爆
漁樂大家由店主肥仔樂、姑姐及表弟暉師傅主理。開張啱啱先兩個月，已經鑽研咗一系列嘅自創壽司，其中最爆嘅就係以性格入菜嘅「壽司三兄弟」，三個球形飯糰分別撒上紫菜、芝麻、蟹子，再放魷魚、海膽及甜蝦喺面，貌似串燒，顏色鮮艷奪目，淨係賣相都攞晒分。原來呢款壽司代表咗三個店主，肥仔樂自言性格怪怪哋，所以先會撞得出好嘅創作，就好似海膽咁，一係就好鍾意佢，一係就頂佢唔順，永遠無中間位；姑姐生性熱情把口甜到漏，同客social唔使三句就成為好朋友，甜蝦就最代表到佢；暉師傅雖然年紀輕輕，已經有成十年日本料理經驗，就最似魷魚煙煙韌韌，夠晒食力。
老闆學生打成一片
佢哋間舖就近PolyU宿舍，所以好多大學生捧場客，晚晚買takeaway返hall勁擦。據店主表示，佢哋自創嘅冰火壽司最受大學生歡迎，原來肥仔樂見香港人鍾意食煎炸嘢，於是將飯糰蘸上天婦羅脆漿，炸至香口金黃色，淋上自家調校嘅芥辣沙律醬，上面再放三文魚或甜蝦，食落又熱又凍又脆又腍，唔同口感一次過有晒！三位老闆同啲大學生玩得咁埋，皆因大家都屬玩得之人，店主肥仔樂仲話自己年年18歲，巴閉過譚校長咁話。齋聽佢哋對話都笑餐死，唔怪得班大學生得閒就會嚟吹水傾偈啦。
肥仔樂小檔案
入行做日本料理師傅十多年，今年2月自己開舖，以新派創意日本料理作招徠，成功俘虜紅磡區一班年輕食客。閒時除咗炮製料理畀食客外，更與暉師傅鑽研新菜式。
冰火三文魚壽司$6/1件
冰火甜蝦壽司$10/1件
最受歡迎嘅冰火壽司，先將飯糰炸至金黃色，再鋪上三文魚或甜蝦，飯糰剛剛炸起又熱又脆，魚生則又凍又腍，口感過癮，小記誠意推介！
七彩壽司餅$20/1件
用餅乾托底，上面鋪上飯、吞拿魚沙律醬、甜蝦及蟹子，值得留意用上牛油、洋葱、吞拿魚粒嘅自家調製沙律醬，香口得嚟無乜腥味，最啱香港人口味。
舟形黃金壽司$44/2件
店主話壽司船畀人滿載而歸嘅感覺，所以將腐皮反轉摺成船身，裏面裝上壽司飯、甜蝦、海膽、蟹子，的的骰骰但材料十足！
如花油甘卷$68/6件
油甘魚魚身肥美，入口有香濃魚味，近年成為魚生新寵。將油甘魚切粒，類似加州卷咁捲至層層有魚生，蘸上脆漿快炸上碟。食落外面熱辣辣，裏面魚生仲係凍嘅，好鬼盞！
韓式鱆紅魚薄切$88/1客
鱆紅魚入口有煙韌口感，食時連青瓜絲，蘸一蘸帶韓國泡菜味嘅辣醬汁，當堂開胃又醒神。
食客有Say
Carmen與仔仔囡囡專登由西環過嚟食，覺得呢度嘅食物幾特別，當中的肉鬆壽司，食落好鬆化，唔會好硬好實。而囡囡Karis就最鍾意食馬刀貝壽司，貪佢好鮮甜。
PolyU學生Kelvin做finalyearproject啱啱通完頂，落嚟買魚生補番吓，最鍾意冰火三文魚壽司，佢仲話啲同學仔有gathering都會落嚟玩。
阿龍（右）：「喺附近返工，每星期都會嚟2至3次，最鍾意就係食佢嘅冰火三文魚壽司，炸過嘅壽司飯口感帶脆，面頭再鋪一塊冰凍嘅三文魚，食落好過癮。」
Yoyo（左）：「我最鍾意食三文魚壽司，每次嚟我都會食一件，因為好好味！」
漁樂大家
紅磡寶來街16A舖（仁孚車行對面，惠康超級市場側）
營業時間：12:00nn-1:00am
電話：23627899
